martedì 11 luglio 2017

L'odôr di stale


Cul cjalt cjaminant
Di sere pal paîs
'nd è barcons che inmò
A butin fûr l'odôr di stale
Tignût pe code 
                                 [di agnorums
No si sa cemût.
Compagn ti cuchin
Dentri
L'odôr dai pomodoros 
                                [su la plante
Dai capsui
Dal smîr
                               [de cjadene
Dai scjatons rassegnâts
Parsore de flame.
Frusign de vite lade
Che ti sporcje i dêts de memorie
La fortune di vivi 
Dulâ che par oris no passin
Machinis
E maluseriis
No si varès di straçâ
E invezit.

sabato 27 maggio 2017

La bree de capasse




Il lat a chês oris chi
Al varès di jessi mancul cjalt
Di no sbrovâsi la lenghe
Di no mangjâ la piel
Ae zornade.

I uciei
A cjantin cence polse
Par rompi i coions
cence rompi i coions.

Il sens di un cjamp 
Di forment
Al è un papavar
Plui alt di chei altris
Di bessôl
Dentri l'inzirli dal vint.

La bree 
Che mugnestrave la capasse
Je colade:
Ogni fuee dal mont
A podarès jessi cagade.

martedì 16 maggio 2017

I strisson par Cagliari e Atalante



Une rose no je


Une rose no je dome une rose
Ma une feride
Netade
Inglaçade
Tal plat 
Dal gustâ di une frice.
E jes par comprâ la verdure
Lis pomis
Cucinsalatetrisculis
Che costin plui di un purcit
Intîr.
Il vâs di rosis
Al cunsume l'aghe
E ce che al reste
Al puce.
Ma l'aghe si cambie
No coste nuie

Cjoli ancje il lat
Che nol sa di nuie
Cence dentri une vacje
Nol coste
Meti la rose tal mieç 
De taule pronte
Di poesiis
Che no disin nuie,
A stan cidinis
Come cheste musiche merecane
Inglese
Foreste
Fate plui di peraulis
Che di sintiment.

La rose e torne 
Une rose
Cjase di bessole
E no je une rose
A son
Un maç

venerdì 14 aprile 2017

Al è adore


Al è adore
Par muiniis e zupets
Ma rivin simpri.

***

E' presto
per mantidi (suore) e cavallette
Ma sempre giungono.

No je grumbule


No je grumbule
Compagne di chê altre
Tal cjamp arât

***

Non c'è zolla 
Uguale a un'altra
Nel campo arato.

Cidine spiete


Cidine spiete
La mariutine zale
Sul ôr de Vierte

***

Silente aspetta
La coccinella gialla
Sull'orlo della primavera

Tal cjamp vert


Tal cjamp vert
Zuin balons di talate
E ducj a vincin.

***
Nel verde campo
Giocano i palloni di tarassaco
E vincono tutti.

Il strisson par Udinese - Gjenue


Dut ben, ancje masse, e alore juste il cartel par fâ i auguris di Buine Pasche!


sabato 1 aprile 2017

Il strisson par Udinese - Palermo

Jessint che al jere Scuffet in puarte, Del Neri in panche... cuissà cuant un sul campo. :)

sabato 11 marzo 2017

None


O ai cjacarât di te
                        [none
cence visâmi che come vuê tu finivis i agns
O ai cjacarât di te a dai forescj
Buine int
E nol vanzave nuie
Di brut
Di ducj i ricuarts che o ai di te.

Cemût âtu fat?

Mai une peraule di masse
Mai rabiose
Mai la stufe
o il simpri chê
che intache intor dai vielis.

Cemût âtu fat?

Jo no soi bon
Nissun al è bon
Ator di me
Isal il mont che al è lât a patràs
O isal dome un mont diferent
                                         [none
Parcè che tu sês lade vie tu?

lunedì 6 marzo 2017

domenica 8 gennaio 2017

Il cartel par Udinese - Inter


E nuie... je lade struncje. Zuât ben. Jankto e Samir pardidone. Ma la sfortune e la ingjenuitât si paìn, soredut cun chei che no ti perdonin une. Pecjât parcè che viodi tre cuarts di stadio che al tife Inter al meretave daiâle sul nâs... Poben. La prossime.

L'ombrene di len


L'ombrene di len,
Discrotade de glace
Guzìe il mûr.

giovedì 5 gennaio 2017

Cjati un kiwi


Cjati un kiwi                         Suntun morâl scalembri
'smenteât de criùre                            Crichin lis fueis
Si scusse cui dincj                      Dal Unvier in vuaite.


Trovo un kiwi/su un albero storto
Dimenticato dal gelo/Scricchiolano le foglie
Si sbuccia coi denti/dell'inverno in all'erta.