martedì 26 novembre 2013

I cuistionaris su la lenghe furlane 4/4

Vuê e je la zornade decisive. 
O ai cjapât feriis di pueste par fâ chel lavôr achì. Vuê e doman.
Il programe al è, la ju in tarde matine a Prata di Pn. comun numar doi. E dopo vê provât ducj i 10 nons di Prata (e vilegnove, e ghirano) là a Porcie, e podopo, a sere tornâ a Prata par tornâ a provâ.
Ae fin de zornade tirâ i conts e viodi.
Poben, chest ce che al è sucedût.
1) ghiran. paîs mai sintût in vite mê. O cjati la mari dal interessât. i lassi il numar, lu si cjate dopo sîs e mieze siete... bon, vie cul prossim paîs, Vilegnove.

2) vilegnove. achì pensavi di vê dome doi di lôr. Il prin o cjati la cjase, ma la puarte e je un puartoncin di len. di dentri si sint musiche. o suni, une volte, dôs. insome. o nol sint o nol ûl sintî. la musiche però mi pâr buine. Rock agns setante, mi pâr, al à bogns guscj, se al è lui. podarès scrivilu sul cuistionari, ma no lu domande. pecjât... o voi la di chel altri.

3) vilegnove. Chest o fâs une fature bestie a cjatâlu. O ai zirât un cuart d'ore. al è il numar 18, al è il 24, tal mieç e je une cjase ma cence numar. o suni un pâr di voltis. nuie. voi su e jù. nuie. denant al è un nezozi di eletroodomestics. ce fasio? jentrio a domandâ? intant doi cjans cuiets come il kraken a van indenant a manifestâ la lôr gjonde. fintremai che a vegnin fûr mari e fie di una cjase al numar no si sa cè e i domandi. Ma al è clâr dulà che o cjati cui che mi covente! dentri tal negozi di lavatricis! stupit jo a no pensâi prime. claramentri chi cjacarin ducj talian. nol à timp. stoi cjariant... sì, o ai viodût, doman? mmm no mi va ben ma i dîs di sì. Aes 11 e mieze. pobon, o vevi voie di lâ sù plui tart... nuie, o restin dacuardi cussì e o voi... niente di fatto. :(

4) prata. o provi une cuntun non che no devi jessi masse taliane. difat no lu è. però e je cjase. jê l'om e une vore di altris... e je zentile. mi capìs une vore bene e mi dediche mieze ore (si stâ al minim mieze ore, e no 20 minûts) e o scuvierç che l'appolo al è il dialet de costa d'avorio. Nô o vin furlan talian, lôr a àn appolo-francês. almancul vuê o ai alc di salvâ. ancje trop che a puce dut, li dentri, un odôr che no capìs ma che nol fâs par me, ma insome. al è il prin cuistionari de zornade, il numar 4.

5) prata, ma in cûl al mont. un cjasâl tal mieç dai cjamps. o fâs amicizie cun sô pari. il fi al è a vore pai cjamps. o in fabriche. nol sa, i lassi il numâr. mi domande se ae fin o ai di vendi alc. i spieghi di no. nol è convint. al à fat il militâr a udin e al sa dî mandi. o tornarai, i dîs.

6) prata, stesse vie di un di prin, li che o ai fat. o rivi a cognossi prime la mari, dopo l'om. la fie e reste platade in cjase. l'om mi dîs che o pues lâ dome in sô presince (no dubiti, soi biel come il soreli, probabil che i varès taconade femine e mari dut un colp) pecjât che cumò lui al à di lâ a vore, fasin usgnot dopo siet e mieze... mmm no, anzi, no usgnot (nol podeve) ti clami jo, lassimi il numar. i lassi il numar. nol clamarà.

7) secont cuistionari. una insegnante precarie plui o mancul de mê etât che insegne lenghis. la figate e je che a sarès stade perfet se il cuistionari al fos stât sul ûs dal venit. no interesse. mieze ore e fate. numar doi de zornade. in trê oris e 120km

8) prata. cjase normâl, nol rispuint nissun, o lassi il biliet.

9) a chi si rît. mi àn dât l'indiriz cence numar di cjase. sperin che al sedi intune vie curte... macchè, lungje doi chilometros. o ai domandât che mi dedin il numar, ma nissun mi à cagât ancje chi. e dopo un al à di meti impegn... poben. o ai simpri vût ampie capacitât di problem solving ven a stâi che o tachi a cjaminâ pe vie, cu la pipe e la lint di ingrandiment. o ai un indizi: il non al è plen di k e di u, e al finis cuntune consonant. o cîr un neri. o cjati une cjase indiziade. o domandi a une siore che passe. Si, mi dîs, li son plen di indians... BINGO! o voi a lei i campanei... nuie! mierde. pobon,. provi a cjaminâ ancjemò... e ve li che o incrosi un neri in machine. Al è di là che al è vignût. o voi, o cîr e ve che mi cole il voli suntune cassete de pueste. a penarel al jere scrite une robe che podeve someâ chel cognom... o suni, e nol è nissun. ma o soi cuasi sigûr... al jere chel che o ai incrosât! si no altri o ai scuviert il non.

10) ultin di prata, chel altri cence numar. ancje chi al è impussibil cjatâlu, a meno che no si vedi un cûl stratosferic, e jo, in gracie che a son dôs setemanis che no voi a cori, lu ai! lu cjati al tierç condomini che o cjali. al ven fûr e al è un cun cualchi probleme (mi pâr un down, a viste) però al è lui. mi domandi ce raze di sfighe cuant che o ven fûr la sôr, modello iene, che mi dîs che no à intenzion di fâ nuie e che e je la curadore legâl e bla bla bla. poben, amen. Pecjât par il spreco di cûl. O incassi il gno prin rifiut.

Soi un pôc smonât. Un pôc tant. Ma provin a porcie. però cumò us al à fâs curte.
1) porcie.  nuie, nol è nissun.
2) porcie. no esiste nancje la vie!!! no sul gno navigadôr, almancul.
3) porcie. e je talmentri fûr porcie che de cjase di prin a son siet km! la siore no je. almancul cheste e je la uniche che mi clame, par dîmi che no à timp, ni a pense di centrâ cun cheste robe. Jê e je venite, punto.
4)  nol è nissun.
5) no cjati la cjase. no, sul serio. no soi rincoionît. 40 al è, 40A al è. ma il 40 B... no, nuie. o suni il campanel al 40A, o domandi a une siore se sa dulà che al è il 40B, o se cognos chê persone. No une no chê altre, mi dîs. Mi tocje lassâ pierdi e lâ vie.
6) nol è nissun. 
7) o cjati la mari, il fi lu si cjate dome sul misdî, doman... si, cioè no, par chè sul misdi o varès di là dal unic apontament, a prata. ma a chest pont o ai cjapât la mê decision.

VONDE.
Par fâ 5 cuistionaris o ai fat 314 chilometris, spindint 21.1 litros di benzine, e 13 oris di lavôr, plui 2 de murose che mi à judât a cirî in internet indirizs e numars di telefono. su 37 tentatîfs a son saltadis fûr 5 intervistis e 2 refudadis (che no valin, eh). Cuntun calcul matematic, moltiplicant par 6 (jessint che 'nd ai di fâ trente) al salte fûr che o varai di fâ plui di 1800km e quasi 80 oris di lavôr. 
Une spese di 1000 euros e plui a front di mancul di 700 che o vignarès a cjapâ.
Mi displâs. Probabilmentri lis intenzions organizativis a volevin fâ par la miôr, ma no è une situazion gjestibile. Se o zontais che o ai sputanât feriis e timp e benzine par fâ chel pôc che o ai fat, disin che no mi sint in colpe. Cun cheste o moli dut e finide chi. 
Cheste modalitât organizatîve no à nissun sens. Mi displâs.

lunedì 25 novembre 2013

I cuestionarîs su la lenghe furlane 3/?

Vuê une serie piçule di tentatîfs... o lavoravi la matine e dut il daspò misdì, ma jessint che o vevi dôs oris di 11 a une o ai tentât...
Il prim tentatîf al jere di gnûf a Puçui, cuntun non di chei plens di Z e K e H che magari di furlan no i interesse nuie, ma magari ju cjati cjase. Ma cè... cjase cence campanel, cence puarte. Dome un puarton sierât e une buchete des letaris inrusinide cun dentri, di traviers, un targhete di fier. Li dentri al devi jessi un pies che no metin pueste. La tiri fûr e al jere chel non. Pobon... o met lo stes l'avîs cul gno numar di telefonin, ma o ai une vore di dubis che al vegni let di cualchidun... e po, no sai, mi somee che dentri di chê cjase al è miôr fâsi compagnâ di cualchidun... Bon, o clami i ghostbusters e i lassi un messaç in segreterie!

Po dopo o voi intune cjase dulà che o soi stât bielzà trê voltis. La siore e fâs la professioniste a cjasi, ven a stâi che mi à dit che no sa mai cuant che e je libare e se e stâ lavorant no pues fa la interviste. Cuindi o sin restât dacuardi che o provi random, cuant che capite. A mi mi è someade une maniere par no fâle, ma va ben. 
O suni il campanel, mi viôt, e pobon, mi mostre lis man cui guants e mene il cjâf. Mandi a la prossime, siore.

Tierç tentatîf, che in realtât al è doi intun, parcè che cjalant chel mi inacuarç che chê vie li e je propit daûr a chê vie de cjase inestistente, chel famôs numar di çuian che nol esist... magari lu cjati, mi soi dit. Putrop nuie di fa. La mari dal intervistât dal numar normâl mi dîs che no sa cuant che lu cjate cjase... al va, al ven, si ferme dome un moment... insome, praticamentri al è il gno identikit, ven a stâi che no mi sint di dubitâ. I lassi il numar, ma ancje chest, mi sa, che no mi clamarâ... E par chê che rivuarde chê altre cjase fantasime, nuie. La cjase no esist, ni devant, ni daûr. A chest pont e sarà une falope di batidure, crôt, e i ai scrit inmò trê dîs fa par savê se al jere cussì, ma nissun mi à cagât. Amen... I furlans a son fantasimis, chest al è il risultât, par cumò.

domenica 24 novembre 2013

Lis pignatutis par Udinese - Fiorentine

Brkic 3.5 pignatutis su 5. 
Lui al è fat cussì, al à bisugne di stimui di cussience. Alore ce al fasial? Dopo 20 minûts di partide i passe la bale a un de Fiorentine, cussì, tant par viodi ce che al sucêt. Par furtune nuie, ma di li, sicome si sint in colpe, al tache a parâ dut. Soredut la parade su Cuadrado, nus à salvât il cûl, e a nol è facil là jù cussì svelts par un puartîr cussì grant. Brâf!

Domizzi 4 su 5
Vuê al à zuiât ben, e no mi covente che al sedi elegant, che al fasi just ducj i passaçs... nol è mica Scirea?! Al è Domizzi, i met i cûr e cuant che nol rive cu la classe si jude cu lis mans e la furbizie. E vuê al à evitât doi gôi, tal prin timp. Un Domizzi in campo al è un secont cjapitani, altri che balis.

Heartaux 3 su 5
Se nol jere lui, no varessin vint. Ma prin Cuadrado i à fatis viodi di ancje... i è coventât un timp par capî cemût (no) marcjâlu! Pecjât che cuant che lu à capît si è fat mâl. Sperin pôc, parcè chest al è un nestri difensôr titolâr

Danilo 3 su 5.
Biel tornâ a viodi il difensôr di une volte, che al sa cuant butâle vie e cuant zuiâle. Nol imbroche ogni robe, ma insome... no zuiavin migo cuintri dai mones!

Gabriel Silva 4 su 5
Allan, profitant di jessi in panchîne, e plui rilassât, prin de partide i à cjolt il tacuin e i à mostrât la sô cjarte di identitât e i à dit: Gabriel, cjale! Tu sês brasilian! Pardabon?, i à rispuindût lui. E si è visât di jessulu e al à zuiât come che si conven! 

Allan 4 su 5
Gabriel Silva i à tornât il plasê e i à dit: "Cjopo, bigul! Tu sês brasilian ancje tu!" e ancje Allan si è visât di jessi brasilian e par di plui di savê il dribbling... di fat, a un ciert pont 'nd à fat fûr trê di lôr che a son ancjemò plens di mal di cjâf.

Pinzi cence pignatis
Fin li al veve zuiât ben, grintôs e ancje eficaç, ancje se nol veve rivât a cjapâ man là tal mieç (ma disin ancje che Valero e Pizarro a son doi siôrs zuiadôrs) purtrop al à fat mâl... ma dome par fâ zuiâ Allan, dopo che al à savût che cuistion dal brasialian...

Bruno Fernandes 5 su 5 
Miôr in campo insieme a Pereyra. Ae fin de partide son vignûts a consegnâi une medaie... al à fat 42 km cuntun timp miôr che intune Maratone! Cun di plui, al à recuperât balons, al à fat un pâr di passaçs in verticâl che o vin bisugne come la man di diu, di vêju... insome. Un zuiadôr cussì al è inmò ingjenuo, ma boia cane, ce bulo!

Pereyra 5 su 5
Al pâr che tai spogliatoios de Fiorentine a vedin lassât un cartel cun scrit sot "Wanted - Dead or Alive". A son inmò che lu cirin...

Basta 4 su 5
Se Fernandes al è rivât ben, inte Maratone, Basta subît daûr. Nol varà fat i cross, ma si pues finalmentri dî che al tornât une furie... Ben Fate!

Di Natale 4 su 5
Al è stât sfigât, ma al è tornât lui. Al à corût, al lave su ogni balon, a li à provadis dutis ma nol à mai vût une bale facile. E pûr al riscjave di fâ un pâr di goi che a saressin stâts i plui biei de zornade di A... no i è lade ben, ma un Di Natale cussì, al vâl 5 muriei... di luanie!

Widmer 3.5 su 5
Jentrâ e pensâ che al podeve capitâti di marcja il Cuadrado viodût fin chel moment, jo mi sarès cagât intor... invezit al à fat la sô partide, e usgnot e al à parfin cumbinât di cenâ, cul gôl che si è mangjât... la siorute di 125 agns dongje di me e à dit che e segnave ancje jê... No mi soi sintût di dâi tuart.

Muriel 2 su 5
Muriel al è potenzialmentri un Cuadrado, ma cun cualchi chilo di masse, cun mancul voie di cori e cu la idee che al baste cori un pocut e si cumbine dut. A varessin di spiegâi che cuant che ti disin: scjalditi, che tu jentris, no tu âs di freolâti lis mans e soflâ parsore... Al ven gnervôs a viodi cemût che o vin un campion, ma no sin in grât di doprâlu. A chest pont... dentri Maicosuel!

In ogni câs, al di là dal risultât, vuê o ai tornât a viodi zûc e une bielissime partide. Fiorentine grande scuadre, cun bogns zuiadôr e un parsore di ducj, parcè che Cuadrado al è di una altre categorie. 
Podopo, e jere ancje ore di viodi il soreli, a Udine, e insome... cjalait chi ce spetacul:

il cartel par udinese fiorentine

Vuê no ai timp di nuie, rivât cumò di bologne e dal conciert dai placebo, e juste il timp di cagâ, lavâmi e vie al stadio a viodi la partide.
pocje fantasie par il cartel, ma sperin di vê furtune...

note:
purtrop o vevi dismenteât la machine fotografiche cjase e il gno telefonin al è malât. la foto e fâs schifo, però jessint che ae fin de partide lu àn fotografât une grampe di lôr, se mi mandais la foto magari!

sabato 23 novembre 2013

I cuestionarîs su la lenghe furlane 2/?

Ben po... vuê zornade memorabile: e je saltade fûr la prime interviste!
Incredibil.. crodeimi, o stavi par paiâlu, il siôr che me à fate.
Un pensionât che al steve fasint un lavôr suntun barcon intal garage di cjase, cuiet e beât. Furlan su dute la linie, ancje parcè che inte letare che i è rivade no vevin neancje metût il gno non e jo podevi jessi cualsisei matuç. Di bon che si sin dits in doi: cirìn di fâle curte (ancje se mancul di mieze ore no si stâ) e si sin disbrigâts. I varès dât une man volintîr a comedâ chel barcon, ma mi pareve che al fôs plui brâf lui. Ma a nin par ordin.
Prime tornade, a matine.
Des 10.00 fintremai a midsì e mieç. O ai fat 50 km, ducj tal comun di Puçui. Parcè? Ma parce che clarementri, di chei 11 che o ai di lâ a cjatâ, 'nd è a Puçui, a çuian, a samardencje, a terençan e Cjargnà... doi par bande, in pratiche. E cuant che tu vâs aes 10 intal puest A par viodi de persone 1 e 2, ma 1 no ti rispuint, ma 2 al torne cjase ca di un pâr di oris ce fâstu? Tu vâs di une altre bande, par tornâ a lì plui tart, dome che intune altre bande al vûl dî intun altri paîs, dulà che dut câs ti capitee compagn... insome. soi lât dôs voltis par paîs, rivant a cjatâ un sôl e a cjapâ un apontament par doi altris intal daspò misdì.

Seconde tornade, pene dopo gustât... par fortune int simpatiche, e je scjampade ancje une gote par digjestîf, che mi coventave, jessint che in vincj minûts o vevi mangjât come par cuarante :)
Bon, trê intervistis, finalmentri... ciert... 80 chilometris fats e plui di cuatri oris di lavôr, ma magari o sarai plui fortunât la sere... 

Ma ce! Une no veve nancje ricevût la letare e mi à cjalât come il piês dai delincuents (che po, e à reson, ma insome), un altre mi veve dât apontament, ma e à scuegnût lâ vie, e il tierç tentâtîf, a siet sot sere, al veve dut il dirit di jessi ator a bevi, jessint che al jere vinars.
Nuie di fâ invezit cu la cjase in vie Basandiele al numar 80 e passe, che jessint che la vie e finìs al nr 72, e devi jessi sprofondâde dentri di un cjamp di menighe insieme cu la int... cuissà se là sot e cjacarin par furlan...

Pobon, cu la seconde zornade, mancul 27 al cricâ dal dì, ancje se la domande che va fasintsi strade e je... - se e va indenant cussì - parcè varessio di pierdi bêçs jo, par fâ chest lavôr?

domenica 17 novembre 2013

I cuistionaris su la lenghe furlane 1/?

Si visaiso di chê letare vierte sui criteris di sielte e bla bla bla...
Al jere un erôr materiâl (cioè, falât a scrivi e a fâ i conts) e lis ai ancje sintudis di Cisilin che mi à dât dal solit furlan contestadôr e che al à di fâ maravees, ancje se invezit jo o vevi bielzâ acietât, di bon furlan sotan, la sielte de comission. Cun di plui a àn di spiegâmi cemût che un al varès di vê savût subit che "al jere un erôr materiâl".
Poben, ma dopo la reintegrazion, cumò mi tocje fâ i cuistionaris...
E sicome îr o ai scomençat e mi soi cjatât intune situazion  a dî pôc kafkiane, o ai decidût di tignî un diari cun voaltris, su chestin intervistis.
Pronti? Via!

Sabide. ore 17.30.
O ai trê comuns e trente intervistis di fâ. Il prin comun al è dongje, Puçui.
O partìs cul prin non e scuvierç cun mê grande simpatie che Cargnà al è dal comun di Puçui.
O rivi intune vie e o cîr o cîr o cîr il numar 14. Nuie di fa. Anzit, al è il 14/1, ma la vie che il navigadôr mi à puartât e à dome 10 numars... bon, mierde. Al è scûr, tornarai cul lusôr, che a son passâts i vizii e mi àn cjalât stuart (un cuntune carteline in man che al cuche sui campanei fasintsi lûs cul telefonin nol devi fâ une biele figure.)
Il secont mi va miôr... mi pâr. La vie e je, e à il numar.
O voi devant de cjase e... insome, fatiscente? Disin che se cualchidun al vîf li dentri, no je persone vive. Baraçs devant de puarte, scûrs fraidîts... tal ort mi pâr di viodi i vuès di un dodo. O decît di tornâ une altre volte insieme a un medium e a un esorcist.
Cambin paîs.

O scuvierç cun sorprese che ancje Zugliano, çuian, al è un paîs di Puçui. Poben... nin al numar 80. Il navigator mi puarte in mieç de campagne.
E pûr la vie e cheste. torni indaûr. Numar 30... 50... 60... 70... 72... vonde. fine. Si zire di une bande e je une altre vie. Simpri dret dome campagne. Insome... cheste cjase no esist. O decît di tornâ ancje li cuntun medium e o voi intune cjase dongje, simpri a çuian. La mê liste di nons a scomence a procupâmi, ma chest colp o cjati la cjase. Nol è nissun interni, nissun A e B o 1 o 2... dome il numar. 17. Nol puarte ben, e difat al è dut scûr. Provi a sunâ il campanel e un vecjut, de cjase di front, al tire la tende e al cuche. Mi spieti di un moment a chel altri che mi dîsi che no je domenie matine, i testemonis di geova ju spiete par l'indoman. Nuie. Nin vie. Nin a Terençan.
Li e je facile... o speri. numero 19/1 (e dai cun chei /alc)
o parchi la machine denant dal numar 18. Cualchi metro a pît, tal scûr e tal frêt, no mi dâ fastidi. 
18a... 18b... 18c... 18d... o comenci a pensâ che e sedi une candid camera dopo che il 18e al rive e di gnûf a rivin cjamps. cjamini... cjamps. Cjamini tal scûr, strade blancje, e cjaf dentri intune poce!
porcodemoni! nie. E pûr... torni indaûr. voi indevant un centenâr di metris e ve li, il 19!
O cîr il 19/alc e induvinait? Al è un dentist! 
O cjaparai un apontament.
vie, intune altre cjase, altri no. Chest al è dongje, voi, parchegji denant. 
Finalmentri une cjase normâl. Pecjât che no cjati nissun. O lassarès il bilietut par jessi tornât a clamâ, ma a) vuê matine mi si è rot il telefonin b) mi secje che a vedin di spindi lôr par une robe che o ai di fâ jo.
Poben, torni cjase. O passi in vie cavalleria, a Puçui. Al è un non ancje li, ma sinceramentri a son 7 di sere. La int e à dirit di cenâ e jo ancje. O lassi pierdi e voi cjase.
sei tentativi. 0 interviste.
Ancjemò 30 al cricâ dal dî!

mercoledì 6 novembre 2013

martedì 5 novembre 2013

Pignatutis par Udinese Inter

îr, cence dubis, tra lis plui brutis partidis che jo vedi viodût a Udin, tal sens che l'Udinese e à zuiât malissim, l'Inter, al à fat il so, ma jessint che no coventave fâ di plui si è limitàt al minim... Cun di plui... al ploveve!
Pignatutis curtissimis alore.

Brkic 2 pignatis su 5. Al è ancjemò là, che al cjale chê bielissime pavee che al à cjapade tal prin timp. Brâf e vonde, al è rivât a gafâle prin che i rivi il balon intor! No sedi mai che Ranocchia, che al jere li dongje, al tiri fûr la lenghe e la mangji!

Danilo 2 pignatutis su 5. Pobon, chei dal inter no son brocs, e nol è facil marcjâju, però, nancje lui nol è un broc. Podopo o ai di capî cemût che un brasilian al pues vê chei pîts di ghise li.... misteri...

Gabriel Silva 2 pignatutis su 5. E pûr al someave di viodi che al cirive di cori, ma mai un dribbling, mai alc di pericolôs... mi sarès contentât di une pidade tai sghirets di un cualchidun, juste par dî di jessi in campo.

Naldo 2 pignatutis su 5. Anche chest, brasilian dome di passepuart, il pît al è cjargnel... Heartaux ce lu tignino a fa?

Domizzi 2 pignatutis e mieze su 5 tal prin timp al ten bot, podopo su bute jù. Ae fin ancje lui al cumbine di ancje, ma almancul tu lu as viodût provâ a inventâsi alc.

Widmer 3 pignatutis su 5. A saressin 2 e mieze, ma e je la prime partide, e al à zuiât miôr di altris. Al pues dome fâ miôr.

Pereyra 1 pignatute su 5. Al jere Halloween, e lui si è travistût di fantasime! Brâf... a travistisi!

Allan 1 pignatute su 5. Nuie di fa, al cor a vueit, al piert cuasi dutis li balis, e chest colp no 'nd à nancje cjapadis. Cuinti zuiadôrs di cualitât al varà simpri di pierdi, se nol cres. La voie, a dî il vêr, la met simpri.

Badu 3 pignatutis su 5. Miôr in campo. Tante, tante voie. Nol à mai molât. Par sigûr, nol è lui chel che al à di dribblâ e segnâ. Ma forsit, a lassâlu tirâ ogni tant, a varessin cualchi gôl in plui. Secont me, un cussì, nol è mai biel vêlu cuintri.

Di Natale 2 pignatutis su 5. Al zuiave di bessôl o dongje dai muarts. Par me cont al à fat ce che al à podût. Però ancje lui si è scoionât dopo i gôi e si viodeve.

Muriel 1 pignatute su 5. Muriel di luianie, o Muriel budiel- Ogni tant, nomen omen. Al jere miôr che al fase la fantasime ancje lui. Invezit al à sielt di fâ il zombi. Biel travestiment ancje il so... perfet!

Ranegie 2 pignatutis e mieze su 5. Bisugne jessi onescj. Nol è facil jentrâ intune partide cussì, ma lui al è rivât almancul a spiçâlis dutis, di testa, e lu si è viodût cori. Nol segnarà mai, ma bisugne dâi merit di jessi jentrât in campo.

Bruno Fernandes. 3 pignatutis su 5. Al à fat viodi di jessi.
Nico Lopez 2 pignatutis su  5, nol à fat viodi di jessi

Guidolin...cence tapon. tant buine e jere la scuadre cu la Rome, tant falade cheste. ma al va dit che se tu cjapis doi gôi su bale ferme par capelis dai zuiadôrs, l'alenadôr al centre une vore pôc.
.


domenica 3 novembre 2013

Il strisson par Udinese - Inter

Ma bundì!
Al plovie? Mah... ancje se o speri che i metereolics a cjapin dal mone e che nol plovi, o ai pôre propit che la partide cul Inter, vuê, e sarà bagnade...
E sperìn che a sedi fortunade, alore, parcè che se ai di jessi sincêr, un Inter che al zuie ben, cui zuiadôr che al à, di Udin nol va vie cence ponts. Purtrop la partide di miercus, cul Sassuolo, mi à fat capî che il Sassuole e je pocje robe, come scuadre, e l'Udin al è pôc di plui.
E pûr i zuiadôrs ju vin!
Vuè cun Brkic in puarte, che al à mostrât di jessi un portîr cui coions (e si visaisu trop che lu criticavin, cuant che al à tacât) o vin, in ogni câs, za une possibilitât in plui di no cjapâ gôi, soredut se in difese Danilo, Domizzi e Heartaux (al zuiarà lui, soi convint) a zuìn al miôr.
Tal mieç soi una vore displasût che nol sedi Basta e nancje Maicosuel, ma o vin Badu, e dai, magari e je la volte buine che o vedin cualchi muse gnove... Merkel, Widmer... no vino di provâju, prin o dopo?
Devant nus tocje viodi Di Natale e Muriel... un siôr atac, al è clâr, ma che al stâ zuiant vonde malut.
E ma miercus a àn pûr segnât....
Sumò su, cjalintsi tai voi... Totò se a nol jere par il rigôr, no la butave dentri nancje se o levi jo, in puarte, e Muriel al jere completamentri inutil e anzit, dai soi pîts e je partide la azion dal paregjo dal Sassuolo. Se al stes sintât, o vin une vore di int che nd à voie di cori (zielinski e nico lopez su ducj).
Bon, ma no stin fâsi masse fastidis, Guidolin al savarà miôr di me lis robis, e se al met in campo une scuadre come cu la Rome, a mi mi va benissim!
Mandi a ducj e buine partide!

venerdì 1 novembre 2013

Lis pignatutis di Sassuolo - Udinese, un pôc tardis

Alore, miercus di sere, intant che o fasevi lis cocis pe vilie de fieste dai Sants, o cjalavi la partide. O pûr o cjalavi la partide e intant o fasevi lis cocis... insome, me soi cjalade dute.
E alore mi va di dâ lis pignatutis.

Prin di dut... metìn in clâr che domenie stade a vin cjapât 0 ponts e a meretavin almancul 1, miercus 'nt vin cjapâts trê ma a meretavin almancul doi di mancul.
E cumò lis pignatis!

Brkic 4,5/5 pignatutis. al à cjapade une pavee e riscjât di dispicjâ Zaza, ma al à fat dôs paradis che, o scomet almancul tre chilos di nutella, Kelava nol varès mai rivât. Si clame jessi svelt, e cuant che un portîr al è alt come lui, ma al va par tiere come une bilite, invezit che come un sac di patatis, al è fuart.
Danilo 2.5/5 pignatutis.. No i doi colpe sul gôl. No le à. Ma une difese che e patìs cussì no pues jessi dal dut lontane di chel che al à il compit di regjistrâle. Podopo, cuant che si sgance (e al à cualitât) al è simpri dibant..
Domizzi 3/5 pignatutis. Al covente. Ripet.. al è come meti un tratôr a fa rally cuintri lis motos... no i sta daûr, ma a rive dulà che al à di rivâ e al è miôr no stâi masse dongje (domandâ a Schelotto par referencis).
Naldo 3/5 pignatutis.. Se chel li al à i pîts brasilians jo soi Obama, no, no il gno cjan, il president. Ma no mi pâr di vê timp di pierdi a scoltâus al telefonin. 1,5/5 pignatutis. 
Gabriel Silva 3/5pignatutis. Mi è plasût, finalmentri un pôc di snait! e cun di plui de sô bande no jerin tancj fastidis.
Basta. 3/5pignatutis. Si, al à vût sfighe di ogni bande. Prime lu àn çuetât, podopo Danilo i creve lis cuestis... ma dut câs al è tornât a cori. Cjalait il rigôr, il Basta di dôs setemanis fa al sares stât doi metris indaûr e al varès fat fal lui.
Pereyra 4/5 pignatutis. Il miôr in cjamp dopo Brkic. Finalmentri al à capît di jessi bon di schiribiçâ l'om. E cuant che lu fâs e dopo la dâ, invezit di pierdile, a son fastidis... par chei altris!
Lazzari. 3/5 pignatutis. Soi une vôs fûr dal coro, lu sai. Ducj a cjacarin mâl di lui. Jo invezit o ai viodût un bon Lazzari, par la condizion fisiche, e finalmentri un Lazzari che al à capît che a chel centrocampo i vûl dât cualitât e timps. Purtrop, nol è il zuiadôr che al fasarà vinci lis partidis al Udin. I mancjin lis ideis e la capacitât di meti l'om in puarte o in fasse in verticâl. No rivi a capî parcè che l'an passât lis veve... Jo ai la mê idee, sul centri dal cjamp dal Udin... se no si cjate un "asamoah/pizarro" no si va in niò! E provâ un Zielinski, ta chel puest?
Allan 2/5 pignatutis. Nie di fa, chest an Allan al fâs fature. Lui al cor e al recupere balons come simpri, ma ju piert cuasi ducj. Forsit al stâ lavant lis scarpis cul savon, ma cence resentalis...
Di Natale. 2,5/5 pignatutis. Ae fin al à fat la sô oneste partide. Bon. Par un zuiadôr come un altri al sarès vonde. Ma no o vin un fuoriclasse. Chês da l'etât a son coionadis. un come lui al pues zuiâ di fer! il miôr de partide, par dî, lu à dât cuant che al rientrave a cjoli bale tal mieç dal cjamp e al vierzeve il zûc... no va ben. chel lavôr li al à di falu cualchidun altri. O ai cjalât, invezit, che al va pôc su lis fassis... e lui cuant che si sposte in fasse cuasi simpri al rive a fâ fur l'aversari... sùmo su, totò, met dentri doi gôi domenie, che tu tornis chel di l'an passât intune partide sole!
Muriel 1.5/5 pignatutis. Al à segnât, e alore? Daimo dai, no stin dî coionadis. Al è stât come zuiâ in 10 par dute la partide. Nol jere. Podopo chei da Sassuolo àn pensât ben di no marcjâlu e al à metude dentri une grande bale dal tucuman... ma nol baste. zuiâ in 11 al rint di plui di un gôl fat.

Bon, vonde.
Domenie?
Domenie mi plasarès viodi zuiâ muriel e merkel. Herataux tal puest di Naldo e parcè di no, un zielinski se propite no vin voie dal mago. Baste che il Guido no mi vegni fûr cuntune scuadre a une sole ponte... Ah, Totò e Muriel, se a zuin come miercus, cul inter, no viodin nancje la puarte!