lunedì 23 febbraio 2009

Vueits


Simona e sintì lis aìnis di Yuri sot ai siei pîts discolçs.
E cirì a palpe lis scarpis, poiadis dongje dal jet, e doprant il telefonin e fasè lûs su la vierzidure taronde de jessude. In pîts intal scûr e spietà che l'implant centrâl di ossigjenazion al tacàs a rontâ come che al faseve ogni cuart di ore, e cuant che e sintì il sgrasaiâ dal motôr jemplâ lis orelis ancje je e impiâ l'argagn che al vierzeve la buse par lâ fûr. Sô mari e so pari e jere sigure che no si saressin inacuarts di nuie, ma chê gnot a nol jere il câs di riscjâ.
E dismontà la scjalute che e puartave al puiûl, picjade intal vueit sot di cjase sô, intant che Yuri la compagnave cuntune man ta la schene.
– Grazie – e cisicà je, poiantsi intal parepet e començant a metisi lis scarpis – E Alan?
– Nus spiete sul Puint Grant – i veve rispuindût il frutat, tirant fûr dal gjubot un argagn che al someave un telecomant.
– Ce isal?
– Un passepartout magnetic – i disè riduçant sot dal çuf – A son dôs setemanis che i lavori parsore. Al vierç di dut!
– E il regjistradôr di ricuarts?
– Lu à Alan.
– O seis grancj! – e disè Simona, cuntune ridade misturade inte vôs.
Si inviarin viers il Puint, compagnant cuntune man il parepet. I cjavei, blancs come il lat, a sfilavin lis scjalutis che, ogni pôc, a si rimpinavin su intes cjasis. Simona, tirade come une cuarde di violin, a tigneve dûr il flât, pensant che e steve cjaminant sot i siums di dute la sô int, mentri che e durmive intai jets. Lis cjasis, retangui cence barcons grampâts intal sofit de grande grote, a someavin gnotui cui voi sierâts, pront jevâ su e svualâ vie. Cuant che il rontâ artificiâl al tacà, come al solit, je e scaturì, e cirint par nature di tignîsi cun dutis dôs lis mans, e pocà di brut cuintri il parepet, cul telefonin che i sbrissà vie, colant intal vueit.
– Mierde! – e bruntulà a alte vôs.
– Dai, su piçule, nuie di grâf, – la cuietâ Yuri, che al veve viodût dut – tu larâs a cjolilu doman matine inte Rêts di Recupar. Movìnsi pluitost, che il vecjo Livio al è un che al stâ pôc a cambiâ idee.
E jere vere. Chel dopomisdì il nono di Alan, che piês che la vecjaie al veve dome la salût, al veve a la fin dite di sì, e a varessin podût regjistrâ sul ordenadôr lis imagjinis mentâi dai siei ricuarts. Al jere un dai pocjissims vecjos che al veve vivût tal mont di fûr, e Simona, Alan e Yuri, a varessin scuviert a la fin se chest mont antigon al jere verementri esistût o se al jere dome une liende di piturâ tai cjâfs da fruts.
Dopo vê saludât cuntune alçade di mustic Alan, a cjaminarin cence intops viers la cjase di Livio, traviersant il Puint Grant e une vore di altris puiûi, strents e dispès scûr, che a voltavin di ca e di là a ogni pissade di cjan.
A savevin di scugnî sghindâ la polizie, parcè che scjamâ ricuarts di un over-eighty al jere un reât, ancje se aromai nissun al veve un grant interès a fâlu, e ancje lôr a jerin une vore malfidant su chei mitics timps dal passât.
Dome cuant che a voltarin l'ultin cjanton si inacuarzerin da lis lûs celestinis che slusignavin propit li che a vevin di lâ lôr. Alc di lunc, involuçat intun linçûl blanc, al vignive calât de vierzidure, e lôr a capirin subit che la aventure e jere finide ancjemò prin di tacâ.
Alan, che so nono lu veve viodût a pene dôs o trê voltis, al restà impassibil, mentri che Simona, poiant i comedons al parepet, e tacà a vaî, e i lagrimons che a colarin intal vueit a traviersarin ancje lis maiis di fier finissimis des Rêts di Racuelte.
– Coragjo. – i disè Yuri, cjareçantle cui dêt blancjissims – Nol jere ancjemò l'ultin. Tu viodarâs che prin o dopo o discuvierzarin cemût che al jere fat chest famôs soreli.

_________________
Version par talian

martedì 17 febbraio 2009

Un cartel par mandâlu in Polonie


Ve chi.
Zire e volte la vôs si è spandude e cumò mi fasin fâ ancje i cartei su ordinazion :)
(Nicola tu as une bire di paiami). Ven a stâi che us mostri il cartel, un pôc criptic, che doman al cjaparà il viaç pe Polonie e, se du al va ben, al insegnarà un pôc di furlan a chei di Poznan :)
Intant, se propit no us va ben cu la Udinese, podês simpri deventâ tifôs dai amadôrs dal Sclaunic, che par cumò a tegnin il nâs devant di ducj chei altris. :)

domenica 15 febbraio 2009

Pescrûtcrotsfritsûsfraits

Si diseve cusì une volte, di piçui, par fâ someâ il furlan a une lenghe foreste:
Pescrûtcrotsfritsûsfraits.
Al voleve dî, in veretât "Pes crût, Crots frits, ûs fraits" che a jerin dutis robis che a povevin fâ une vore "schifo". Mi è vignude su chest mût di dî, vuê, par la fotografie che a viodês e che no je il risultât di cuissâ cuâl inquinament, ma la fin dal puâr scuâl de ledre di Sclaunic, propit daûr i orts. Cualchidun, ancje se de imagjine no si viôt, al je inmò vîf, ancje se aromai, al varà bielzà tirât i sghirets di cualchi ore.
No je une robe masse biele di viodi, nomo?
Vuê se o vês let i giornâi a vês viodût che chest pes al je mancul piês dai cuintâi di cjar lade di mâl che ân cjatât, ma o volevi dome pandi une riflession ancje su chest, e no dome su la cjar, che chel al je un reât e che si rangjin lis vigjii e carabinîrs a cjata cui che al je stât.
E je usance, di cuant che o jeri frut, che il Consorzi de Ledre-Tiliment al gjavi la aghe inte nestre piçule ledrute (come in tantis altris) cu la motivazion di netâlis des scovacis e de jerbe. Par solit, cuant che sierin la aghe, a passin chei dal ETP (mi pâr) a cjapâ sù il pes che al vanze par molâlu di altris bandis o tignîlu in alevament par semenadis che àn di vignî.
E chest pes? Parcè lu lassino murî cussì?
La rispueste no je tant dificile: chest pes nol je trute.
Lis trutis a àn un valôr economic-alimentâr, evidentementri, e cuant che passin a cjapâ sù il pes, si viôt che a stan ben atents a no che i vegni sù inte vuate il puar scuâl (o gjavedâl, o vanin, come che a lu clame cualchidun).
Se la critiche come animalist no pues fâle, parcè i volarès la insot un tic di plui, a pues di sigûr fa une critiche ambientâl-sanitarie: chescj chilos di pes cumò a laràn di mâl, e lassin sta la puce, che di sigûr a tacarâ a sintîsi pene che al va vie il frêt, ma isal un ben pai bateris e microorganisms che a nassaràn de decomposizion?
Che o sedi colpe dal Consorzi, che o sedi dal ETP, dal Comun o dal Pape, la puce a varàn di nasâle chei di Sclaunic!
E fortune che jo o soi a stâ lontan :)

domenica 8 febbraio 2009

Il cartel par la Udinese cul Bologne

Ben po...
Aromai o stavi par rassegnami a un misar zero a zero
O jeri juste chi sul blog che o metevi adun la imagjine e ve che Sanchez nus à regalât il gôl de vitorie!
Miôr di cussì!
Dai che a si torne a cori...
Il soreli blanc e neri al vignût fûr!

mercoledì 4 febbraio 2009

Un voli de gnot


Un voli de gnot
Une grispe dal scûr
Il barbezuan