martedì 29 dicembre 2009

Cuant che il blog al tire flât a grops

Chest al è l'ultin post par chest 2009 e a lu dopri par fâ une cjacarade far me e me su chest puar blog.
Il fat che al tiri flât a grops nol è un misteri.
Si lu viôt dal numar dal post che al è calât, ancje se planc planc, si no altri, o scrîf plui coretamentri.
Il merit e la colpe di dut e je la ostarie, che mi gjave scuasit dut il timp di blogarin furlan.
Nuie di mâl, intindinsi.
Dome che a mi displâs lassâ masse vueit chest puâr cîl glaçât, soredut cumò che a mi sarès facil distrigâmi a scrivi in marilenghe.

Ce fasio? Lu sierio? Lu tegnio viert?
Plui che altri al merete di restâ viert par che mi va ben di meti i cartei de Udinese.
Contis al è un pies che no met (che no vul dî che a no li scrivi eh) e poesis e haiku a podaressin ancje vignî, ma disin che pes poesiis o dopri ancje masse il me diari personâl. Di fat, se la naturalece tal cjacarâ le ai in marilenghe, la paronance lessicâl le ai par talian. 
Nuie di mâl nancje chest, ancje par che la paronance lessicâl in marilenghe la stoi planc planc tirant fûr.

L'amôr par lis peraulis, di fat, lu ai simpri vût.
Tant al è vêr, che invezit di pensâ a inzornâ chest blog, o ai pensât a vierzi un altri (par afars che no us stoi a contâ) che al è destinât a murî, almancul che cualchidun nol vedi voie e cûr di cjapâlu in man.
(il blog al sarès pensât par un lavôr di fâ cui fruts di scuele, a dì il vêr). A ogni mût se a cualchidun i ven il mat di lâ indenant... ve chi, baste che mi domandi e i cêt il blog.
Ah sì, lu ai clamât la tane des peraulis... par salvâ lis peraulis furlanis in vie di estinzion. :)

Pal rest ce altri?
Nuie.
Un auguri di bon 2010 a ducj chei che par gust o par câs a passin par chi.
Mandi!

Zulugne pardut


Zulugne pardut
Nuviçade la jerbe
Piâts i morâi

mercoledì 9 dicembre 2009

Raiz Friulana, la maravee platade dal Friûl

Al è un pôc che no inzorni chest puâ blog e mi displâs.
A romp il cidinôr dome par une segnalazion, di un sît che ancje se no us interesse al merite di fâi une riflession parsore. Un dai frecuentadôrs de Ostarie Contecurte al è Eduardo Basquera, che al cjacare furlan e, di ce che o ai capît, lu à imparât di Galliano De Agostini.
Dut normâl, noh?
Bon, nancje tant, a dî il vêr, se a tignîs cont che Eduardo e Galliano a son di Buenos Aires!
Si che ve chi la segnalazion che us fâs.
I vons di Eduardo a son di Braçà e lui, intal 2006, al è vignût chi in Friûl par viodi la tiere di so pari.
Cussì al à pensât di ripuartâ dut sul web, intun sît che a podês cjatâ fracant achì, e che al à une particolaritât bielonone: al è trilengâl!
Sì: spagnûl, talian e... ...  Furlan!
Sì, propit il bon Eduardo, judât di Galliano (che ancje lui al à un blog, o ancje plui di un), al à metût adun un lavoron, contant dal so viaç inte nestre tiere e us disarài che al da di insegnâ.
Masse spes nô o spudin tal plat dulà che a mangjin, o pûr, se al va ben, a no i din nissune impuartance. Al è une vore biel lei cualchi rie di chest diari e viodi trope bielece e trope maravee che un fi di emigrâts al cjate in tal nestri friûl e inte nestre lenghe. Se pensi a ducj chei che la sbelein, a confront di lui che a la impare... ben, al è pôc ce dî.
Dait un cuc, se us capite.

martedì 24 novembre 2009

GNOGNOSAURS!!!

Ve chi! No pues fâ di mancul di rompi ancje a chei cuatri scalmanâts che a passin une volte al mês su chest blog maltignût (no je colpe mê, al è che o soi simpri in Ostarie!) e di dî a cucj che a nus stan invadint!
Cemût cui!?!?
I GNOGNOSAURS!!!
Cjalait achì se a no mi crodês!
E se jo fos in voaltris e a ves voie di fa gjoldi un frut o di fâ gjoldi il frut che al è in voaltris a larès a fâ un salt li de librerie ribis e par Nadâl o regalarès un libri dai gnognosaurs, che i fumuts inteligjents a fasin deventâ mancul gnognos!
(Anzit, il slogan ideâl al è chest: MANCUL GNOGNOS E PLUI GNOGNOSAURS!

sabato 21 novembre 2009

Rugby in Friûl



No no, nol è par la Udinese vuê il cartel, ma pra l'Italie.
E no di sigûr la Italie Lippicentriche e malbastide dal balon, ma la Italie des pachis tes canolis e dai voi neris.
La partide e je bielone, il stadio al è plen e no si podeve spietâsi di miôr.
Viodìn cemût che e va!
:)

domenica 8 novembre 2009

Il cartel par la Udinese cu la Fiorentine







Intant par cumò metin il cartel di vuê e sperìn ben, ancje se no soi masse fiduçôs.
Sperin che no nus fasin viole lôr :D

mercoledì 28 ottobre 2009

Il cartel par la Udinese cu la Rome



Vuê sì che je lade ben! A vendi patatis la Rome e che zuiadôrs bogns dome di pestâ i sghirets. :)
E po e je ore che un pocje di fortune e torni indaûr invezit che scjampâ vie.
E un brâf a Flores che forsit e je la volte bune che al à capît cemût ficjâ dentri chê bale.
Il cartel, magari un pocut criptic, al jere dediât a la cuistion di D'Agostino e des sôs critichis. Ancje comprensibilis, forsit, ma che lis prestazions di Asamoah (un dai miôr centrocampiscj che zuin intal campionât talian, soredut se rapuartât a la etât) e di Floro Flores 'nd àn fat dismenteâ dal dut.
E di cumò, plui balon e mancul lenghe :)

mercoledì 21 ottobre 2009

Francis e i spirts

No no, no àn cambiât il non. O soi jo che o voie di cagadis :)
A ogni mût vuê us lassi dôs peraulis su chest disc, chel di Francis and the Phantoms, jessint che chê altre sabide o soi rivât adore a sclaudâ il cûl de cjadree e a lâ fin a Cjasielis, a Cormôr Salvadi.
Al è un pies che no rivi a lâ al concierts di cjase nestre, par une robe o par une altre, e chest colp che soi lât o soi stât content.
Lassìn stâ il fat che cuant che o soi rivât o ai cjatât chel cjastron di Sun druthi (che vuê par altri al finìs i agns: Bon Complean Sandruti!) che no dome al jere li par bevi une bire, ma al jere, o ai scuviert, l'element "in plui" dai Francis. O dîs in plui par che pene che mi à dit che al veve di sunâ jo i ai fat: "Ma alore tu as vint il Premi Friûl da l'an passât?" e lui " Beh, no.... ma... sì... par cè..." Al che o ai capît che al jere miôr no domandâ plui nuie.

A ogni mût vignìn al CD e al conciert.
Tachìn dal secont: biel! Mi soi divertût. Lassin stâ la sielte di tignî dutis lis lûs distudatis che se intal imprin o ai pensât che e jere une figade ("a son phantoms" o ai pensât) dopo un pôc o ai pensât che forsit a vevin cualchi probleme cu lis lûs. :)
Ma insome, par sintî la int che e sune no covente cjalaju in muse, cun di plui che il spetacul a nol jere dome di sunôrs, ma ancje visîf. I Francis, di fat, a àn ancje metût adun un pôcs di acompagnaments senics. Preseabil, almancul intes intenzions, il bal di trê fantacinis cuant che a àn tacât mi àn fat pensâ adiriture a la "danza butho". Podopo e jere dute une altre robe, ma insome, almancul al jere alc di diferent e no mi è displasût.

E la musiche?
Buine! Francis nol à sigûr une vôs elegante, ma chel so timbri dissonant al à rivât a doprâlu une vore ben, soredut intes parts businadis. Disìn ancje che subit ti vegnìn tal cjâf doi nons: Bauhaus e Massimo Volume. Inutil zirâ ator. Il prin al è un dai pont di riferiment esplicits dal grop (almancul sul myspace al è scrit cussì); il secont al è inevitabil no pensâlu, soredut intes part dal "cjacarât". Su chestes influencis zontait la part eletroniche di Sun druthi, si sinth a la ghitare e a la vôs cavernose che e stâ daûr, e ve lì che a vês un Conciert che al cjape sù grinte. Tant l'è vêr che la prime robe che o ai pensât e je stade chê che Francis e i siei colegas a jerin plui brâfs on stage, che sul disc. Sul disc mi parin cuasit plui vueits, plui flaps, mentri che dal vîf la energje e rivave a miorâ ancje la cualitât dai tocs, e no dome la lôr emotivitât.

Al reste, a la fin, un consei, se par câs us capite di lâ a sintîju sunâ: se us plasin grops come i joi division e i za citâts bauhaus e massimo volume, vait. Se invezit no sopuartâis chest grops al puês stâi che a stuarzedis un pôc il nâs, ancje se o crôt che il  conciert al sedi in ogni câs sopuartabil.

Critichis?
La frute mi à dit che a jerin un pôc cagons, e un pocje di reson le veve, ma il dut al faseve part de performance e al è just cussì. Une critiche mê invezit e rivuarde la conte contade in sierade di conciert. Une conte in musiche, rispiet a une cjançon, e à il difiet che tu la sintis dôs trê voltis e dopo ti stufe. Almancul intal conciert al sarês biel contâ une conte difarente di chês sul disc. Vustu meti ce biel sierâ il conciert cuntune sielte di 5-6 contis di contâ? (ancje di chês di pôre, 'nd è une vore di contis furlanis, baste cirî )

Bon. O ai cjacarât ancje masse.
O sieri cuntun preseament pai tescj, che in cualchi toc a son verementri scûrs e evocatîfs e a fasin de semplicitât e des anaforis il lôr pont di fuarce. Su ducj, a titul di esempli, i viers di Zombies:

A àn un esercit di muarts
A sunin lis trombis dal Judizi
A àn un esercit sconfinât cui standarts neris
Cu lis çoris e i astôrs che a svolin parsore
Dute la plane e criche di vuès

Mandi a ducj!

domenica 18 ottobre 2009


Porco can, ce domenie nere
E je tacade mâl, no sai parcè. No dome il Sclaunic al à perdût e cun di plui zuiant di mierde. No dome mi soi crevât un zenoli e o soi a mieze strade tra il disperât e une bestie (e çuet, ancje).
Mi è saltât ancje un fanâl de machine e la Udinese, che inçusside, e à pierdût 3 a 1, e pôc al vâl il cartel di vuê. Conte nus al à fate, altri che balis!
Poben, us al lassi instès, ancje se par disperazion.

(ve chi, propit zornade di mierde, Blogspot nol cjame la imagjine par un "errore interno")
va ben, plui indevant... bon, cjamât.

Mandi a ducj!

sabato 17 ottobre 2009

Un ricuart, un haiku

O lei propit cumò, su la Patrie dal Friûl, che a setembar al è muart Beno Fignon. No lu cognossevi, a dî il vêr, ma o sai di vê cjase, di cualchi bande, i siei haiku furlans. E jo o ai simpri vût un ciert preseament par chei che a cirin di cjoli une robe e fâle cambiâ cence snaturâle e cence mancjâ di rispiet a chê robe. I haiku a son une forme poetiche gjaponese, la plui curte e antigone, e ancje se a son milions di haijin al mont (i haijin a son chei che a scrivin haiku) a son pocjissim che lu san fâ.
(Almancul cussì a disin i gjaponês, che a disin che un brâf poete di haiku, inte vite, al rive adore a scrivi si e no cinc poemas meritevui).
Ben po, no ài lis competencis par savê se i haiku di Beno jerin bogns, ma di chei che vevi let di sigûr al jere un che al veve vut rispiet sedi pe forme gjaponese, sedi pe chê furlane.

Cussì, si che lu ai scrit îr matine, us lassi un haiku fresc fresc.

Distirâts pai cjamps
Soreli e zulugne
A panze plene

Mandi!

lunedì 12 ottobre 2009

Un pocje di musiche e di videomusiche

Ben po, mi va di cjacarâus di un pâr di robis che e àn a ce fâ cu la musiche des nestris bandis.

Comenzin cuntun video musicâl. Anzit, plui che un video une figade!
Ve chi, no stin fâle tant lungje, fracait e cjalat voaltris:

Vanilla Resident - Pagsley's Room from solardevice on Vimeo.
Il regjist dal video al è Simone Vrech, un cjastronat che al à fat ancjemò lavôrs di cheste fate e che cuant che mi ai contât la idee, prin di metile in vore, za mi pareve une figade, ma la realizazion e je une vore professional (a la inglese, of course)
Il grop invezit a son i Vanilla Resident, trê zovenots di Tumieç che o pedês sintî sul lôrspace e che a son za al tierç disc, se no sbagli. Il toc, par altri, al è une vore bon, par cui che i plâs il gjenar (e mi mi plâs, se no si jere capît)

Che altre robe di dîus al è alc sul grop che al à vint il premi friûl. Ta chê sere o jeri in ritîr spirituâl in tal lignanês e no soi lât a viodi la gare (ok, ok, o jeri a frice bande sabbiadoro), ma o ai recuperât in part lant al conciert di sabide a Cormôr Salvadi e cussì, oltre a scuvierzi che i Francis and the Phantoms a àn il coraç di fâ sunâ cun lôr ancje sundruthy, o ai scuviert ancje che, sfiorant di spes il massimo volume style misturât cun reminisencis bauhaus, il grop a nol è nuie mâl, e cun la sô misture di suns eletric e eletronics, al rint une vore di plui dal vîf (ancje se la me frute e à dit che son un tichinin cagons :)
che su disc.
Ancje di lôr podês lâ a sintîju sul lôr space e us lassi un video dal vîf cjatât alì:



Bon. Vonde par vuê. e se seis rivât a lei fin chi cence cjalâ il video cjalaitlu che si no al puarte sfighe!

lunedì 28 settembre 2009

Il cartel par la Udinese cul Gjenue

Benon!
No podês che il cartelon par la Udinese nol à puartât fortune ancje chest colp! :)
Di sielzi, la domenie matine, o vevi chestes altres dôs opzions: "In Gjenuerâl o pens'n di vinci" che però mi someave masse inteletuâl, ancje se forsit a me pari i plaseve di plui; e "La zebrute biele dute, in grifon intal cjanton".
Dopo ai sielt chest ca che mi pâr che le à induvinade. Che po a jessi sportîfs un rigorut par chei puarets cul braçut curt al jere, forsit ancje doi, ma insome... cun ducj chei che nus gjavin di solit (a començâ di sabide cul inter "mangjâ e murigno") podìn ancje vê un pôc di cûl ogni tant!
Mandi a ducj e fuarce Udinese!

E ve chi la fotografia dal sît dal Udinese:

mercoledì 23 settembre 2009

Il cartel par la Udinese cul Milan

Vuê o ai decidût di jessi pôc scaramantic. No mi interesse nuie, cul milan, o vin di fâ biele figure.
Butâi vie la dentiere, ripâi la mace, robai lis batariis dal ampliphon... Insome, ogni dispiet pussibil al è bon a cheste scuadre di vecjos rimbambinîts!
:)

O zonti al post ancje la fotografie sul Gazetin dal dì dopo, ancje se no si viôt un caz, ma non impuarte :)

E chi cjatais une altre foto cjolte sul sît dal Udin. :)


Anzit, ve chi che la met chi sot:

lunedì 21 settembre 2009

I prins doi cartei dal an!

Lu sai, lu sai... soi stât un pocut sflacjon e no ai metût sul blog i cartei par la Udinese di chest an...
Chest al varès podût jessi motîf di disgraciis in dut il mont, come che nus insegnin chei da la pavee... (se une pavee a bat lis alutis... sì, insome, la savês ancje voaltris :)
In ogni câs o cîr subit di rimediâ e intant che o pensi al cartel di scrivi pe partide cu la zeriatrie... ehm... cul Milan, us mostri i doi prins cartei dal àn...

In efiets no ai comenzât tant ispirât, ancje par che la scuadre no mi pâr cuissà cè ispirade.
Sperìn che si inacuarzin subit che par vinci bisugne guadagnâsi ogni bale e spudâ balins.

In ogni câs ve chi i cartei che vevi metût in man a me pari inte prime partide e in chê di setemane stade:



Mandi a ducj!

giovedì 17 settembre 2009

Une Ostarie Virtuâl che devente Reâl

Come che o savês lis mês contis (chês par furlan) ogni tant, a saltin fûr ancje intune altre bande: la Ostarie Virtuâl di Contecurte.
E di sigure lu vês za let inte Ostarie che o sin a Friuli Doc, ma no mi coste nuie lassâus il comunicât stampe di Federica Angeli chi sot, che no si sa mai di cjapâ un client in plui :)

“Contecurte: leturis in marilenghe par une ostarie leterarie itinerante”

Une gnove impuartante in salse furlane e inricjìs cheste edizion di “Friuli Doc”: la colaborazion cul blog “Contecurte”, singolâr e divertent contignidôr par mininarative in marilenghe, e crearà la ocasion par trê apontaments pardabon golôs in diviers locâi storics de citât.
La particolaritât di “Contecurte” e je che si trate di une “ostarie leterarie virtuâl” une vore origjinâl, dulà che ognidun al pues lassâ contis curtis letis daspò de comunitât leterarie. La idee che l’Ufici par valorizâ la lenghe furlane dal Comun di Udin al à proponût al staff di “Contecurte” e je chê di calâ te realtât cheste ostarie virtuâl, puartant lis contis letis “dal vîf” tes ostariis storichis de citât. Grazie ae misture di leterature e enogastronomie al nassarà un clime dal sigûr interessant e di no pierdi: ancje parcè che la cualitât des contis sielzudis e je pardabon di rivuart.
I apontaments a son fissâts par


vinars ai 18 di Setembar aes 18.30
inte ostarie “Sbarco dei Pirati” in vie Bartolini;
sabide ai 19 di Setembar aes 20.00
al “Vecchio Stallo” di vie Viola;
domenie ai 20 di Setembar aes 18.30
tal bar “Da Artico” in borc di Poscuel.
In dut a saran letis 12contis, cualchidune scrite di pueste par “Friuli Doc”, ducj a son stât metûts dongje intun librut dât fûr sore nuie in ocasion dai trê apontaments.
Il miôr de narative curte in marilenghe us spiete: e tra une degustazion e chê altre nol sarà dificil cjatâ mieze ore par gjoldi dal incjant di une conte par furlan in puescj pardabon speciâi come lis ostariis storichis di Udin.

mercoledì 16 settembre 2009

Marum di avost


Lis stelis àn profumât la gnot
Fin tai vuès
Il marum di avost
Al picje al cuel lis sôs mascaris
Il cricâ dal dì
Frignot
Al peste i pîts
Ma ancje lis matinis plui lusintis
Si son jevadis sot di un cuvier blu

mercoledì 9 settembre 2009

poesie cuasi weird

O vês fat sù un cjiscjel
Cun ongulis di striis
Prin pestantlis
Par fâ vignî neris
Lis spicis e lis plumis
Dai miarlis
O vês sunât i tatuaçs
Su lis piels
Dât di mangjâ a lis cometis
La lôr code
Fat menâ il rîs
Parsore dodos e paveis
E cumò
No contents
Ce altri voleiso?

lunedì 7 settembre 2009

Colp di soreli (11)


Un tocut di pan
Piel nere
Un braç pleât e une pose
Picjade sui dêts

Lis alis
Blancjis e neris
Lant plui planc
A cusin cence incrosâsi
Il cîl al mâr

giovedì 3 settembre 2009

Colp di soreli (9)



De man
Intant che al jemple lis pletis mi cjale
Il savalon

Si lasse lâ
Grignel par grignel
Come se al fos une cjançon:
Tastieris, ghitaris, bas,
Batarie, cidinôr,
Il baston de ploie
E une vôs nete
Che e cjacare simpri di Istât

mercoledì 2 settembre 2009

Colp di soreli (6)


Il soreli
Cun dêts delicâts
Al tire in bande i custums
Ju fâs sù e ju fruce come la cjarte
Di un cjocolatin

La piel
Scusse di une pome masse madure
A tire il flât
E e tache a ravaiâsi i bregons

giovedì 6 agosto 2009

Vacancis



Bon
A nin in vacance
E il blog al ven in vacance cun me
cussì i fâs cjapâ un pôc di soreli ancje a lui

Mandi a ducj!
Si sintìn a fin dal mês.

mercoledì 5 agosto 2009

Vierte e sieriduri


Un prât di disniçâ
sfodrât di rosis e di crots
Tramais e garbatui fats sù de jerbe
Che e va indenant a fâ fature
a cori daûr ae Vierte

Jo o resti peât
A un gjat dal pel fof
Di braçolâ
Cu lis cjarecis che a si incjastrin
Tes grispis des mans e dai voi

Il pîts a van indenant
A pacjâ in tes pocis
L'aiar al petene i sgrisui
La cjarande
E siere i voi intune gabie di veri

Jo o russi lis mans
Frêt che al samee regalâ colors
Al flât lassât in sfrese
Dut ce che o pensi vuê
Si pues platâ intun butul

giovedì 9 luglio 2009

Vistîts


Mi plasarès
Vêti discuindon
Discolce e dineade

Gjolditi
Stiçâti
Butulâ

Comprâti vistîts
Par fâti restâ crote
In chescj timps
La che ducj si viestin
Di Parsore
Cence cjalâ
Ni dentri ni sot

Mi plasarès
Ma no ai vonde
Braùre
Di lâ ator vistût
Vistût

martedì 23 giugno 2009

Imparât avonde


Ancje s'ai imparât
A stâ di bessôl
E in companie

A sierâ il cjâf
Intune scjatule
Intant che ator a sbrurtin lis peraulis
E i clostris
E lis paveis
Che àn dismenteât i burlaçs
Tes galetis

Ancje s'ai imparât dut
Chist
E a cuei
Lis bestiis che mi corin daûr
Cence che la cjar
E cjapi di stiç

O ai ancjemò pôre
Dai miracui
Dal masse ridi
E dai buratinârs

_________________
Vuê o vevi voie di inzornâ ancje chest blog, ma si che mi secjave scrivi o ai voltât une poesie che o vevi scrit su chest altri. La robe biele e je che voltantle mi è vignût, a un ciert pont, di cambiâi un pôc il sens. Al è saltât fûr un biel confront. :)

domenica 17 maggio 2009

Il cartel par la Udinese cul Milan

Ben po, cui lu varessial mai dite di viodi la Udinese vinci sîs voltes di file...
Robis di no crodi. Soredut parcè che îr in cierts moment a chei de gjeriatrie... ehm, scusait, a chei dal Milan, i àn dât lezions di balon.
E pôc impuarte se chei coions de rai a disin dome che il Milan al à pierdût e che a somee che di chê altre bande dal campo al no stedi stât nissun...
Se o vês viodût la partide o savês.

Ve chi il cartel che i mei a vevin puartât îr al Stadi, e pôc plui sot chel che a vevin puartât dôs domenies fa.
Jo a l'Europe no sai se o rivìn, parcè che la Rome une altre partide la vinç, ma no si sa mai, e po e je simpri une sodisfazion...

Fuarce Udinese, che al à reson Sanchez: il prossin an bisugne provâ il scudet! :)






E velu chi su la pagjine dal Gazetin :)



lunedì 27 aprile 2009

Il cartel par la Udinese cu la Fiorentine

Al è di un pôc che no inzorni chest puar blog e chest cartel par la Udinese no us al vevi metût.
A chi a sin inte partide cu la Fiorentine, là che i vin molât tre patas, e se o nin indenant cussì, a fuarce di rigôrs, colp di cûl e biei goi, a va a finîle che nus mandin in uefa a rips.
A ogni mût il cartel al à fat sucés e al je finît sul bon messagjero.
Si acietin conseis par chel cun la Atalante. :)

Mandi!

giovedì 16 aprile 2009

Il cartel par la Udinese cul Werder Breme

Vuê nuie scaramanzie, nuie pretatiche. Vuê nuie platâsi. Stadi plen e sperìn che chescj doi gôi a saltin fûr. Ve chi i cartei... Mandi e vie ducj a tifâ!

martedì 7 aprile 2009

Il cartel par la Udinese cul Inter


E je lade come che e lade. Cuntune scuadre che a vincj minûts de fin si permet di meti dentri figos e vieras a jere za scrite... ma cul Inter o vin fat propit une biele figure. :)
Sperin ben par Breme!

domenica 5 aprile 2009

Furlan, concors e partecipazions

Îr soi stât a Spilimberc. A fâ ce, si domandarês... :)
A la premiazion dal concors "Zâl par furlan" dulà che insiemit al Brâf Furlan o sin rivâts tierçs, cjapant, disint cussì, la medaie di bronç.
Lassant pierdi lis cuistions leteraris, che in chest câs no mi interessin plui che masse, jessint chist il prin zâl che o scrivevi e jessint pôc plui di un an che o scrîf par furlan, îr o pensâvi a cualchi altre cuistion...

Îr, intant che viodevi une da lis pocjis premiazions che començavin puntuâl, a duravin pôc e a vevin di biel che si viodeve une serietât e une semplicitât di font, o stavi pensant al numâr dai partecipants al concors.
18 animis, che a pâr che vedin fat contents chei di Spilimberc. Tra l'altri ancje la volte stade, l'an passât, a jerin stâts in 18, mi pâr. Il mê pensîr al jere di chest gjenar: al è un pies che o fâs concors, e dispès mi capite di fâju tant par fâ. Ce che però mi capite di viodi, ogni tant, a son concors leteraris cun 50-100 o 200 concorints, dulà che il montepremi al è magari ancje dome un libri o cualchi dvd. A Spilimberc il premi par il prin a jerin 1000piarçui, 500 par il secont. (no, il tierç nuie schei ;) Jo pensavi che, cun chestis premessis, ancje se par furlan a scrivin in pôcs, almancul une cincuantine di partecipants a saressins saltâts fûr... magari ancje cun contis scritis cussì, in maniere "a la bigul di cjan" come che mi capite di fâ a mi ogni tant.
Cussì mi domandavi parcè...
In font la idee di 'Zâl par furlan' e je biele, il concors al è tematic, la zurie e je serie e, mi pâr competente (ok, la conte vincente no jere un zâl, ma e jere biele), il montepremi al è bon, il volantin al è biel...
Rispuestis?
1) pôcs scritors furlans? No, no je vere. O cognòs une cincuantine di lôr dome jo
2) pôcs che a scrivin par furlan? No, o almancul, contant dome ducj chei che fasin e àn fat cors par scrivi, la int che scrîf e je.
3) pôc reclame? Po stai... provait a meti "zâl par furlan" su google... cualchi blog vecjo di un an, cualche link che a nol funzione plui... Invezit si varès di cjatâ la pagine de premiazions, dai vincitôrs, "l'albo d'oro"...
4) pocje convinzion inte organization... no, forsit no, però e je vere che si respire un pocje di rassegnazion gjenerâl in tantis iniziativis di chest gjenar
5) i fastidis di consegne dai elaborâts (copis, buste, e vie indenant...)

Boh.. a dî il vêr dopo un pôc mi soi stufât di pensâ, ma al jere cussì par cjacarâ :)

Za che soi o ai di segnalâ ancje la mê segnalazion in chest concors, immaneât de Ars Venandi, dulà che invezit, tant par dî, o pues fâus viodi il sît cui segnalâts e premiâts...

La finîs ancje cun dîus, tant par cjacarâ ancjemò di partecipants, che soi rivât cuart a chi, su sognihorror, dulà che, ancje se i premis no jerin nuie di cè, a jerin un centenâr di animis. Di sigûr al à judât il fat di spedî vie mail le conte cence tantis menadis :)
La conte la podês lei ancje par furlan, bielzà metude timp indaûr. :)

Mandi a ducj!

sabato 4 aprile 2009

Donald dal Tiliment di Stiefin Morat

Ve chi, che o soi rivât ancje jo, che o rivi simpri tart.
Di chest libri si è cjacarât tant, e mi pâr di vê capît ancje masse, un pâr di agns fa. O ai let un pôc tor pai blogs di articui critics e di articui che invezit lu esaltin.

Fat a stâ che dopo cualchi rie mi soi stufât di scuasit dutis lis cuistions e lis argomentazions, parcè dispès si lave a cirî motivazions che cul libri no centravin nuie.

Cussì o ai decidût che us dîs la mê e mi sbat i cits di chê di chei altris :)

Alore.
Donald dal Tiliment al è un romanç stran, trasversâl, sedi tal lengaç doprât, sedi inte misture di elements fantastics, dai fumuts e de leteradure plui classiche. Al è un piçul melting pot leterari, se cussì o volìn dî, che però al è fat cuntun ciert criteri, in maniere che a la fin dai zûcs ti resti une storie, dai personaçs e un sens di completece che, par solit, dome i romançs ben fats a lassin.

Us dîs subit che a mi mi è plasût. A part cualchi piçule falope di batidure al è pôc altri che no cjati ben rivât. Forsit la gjestion de trame e tache a cori un tic masse indenant, e chest al pues penalizâ il letôr parcè che il lengaç doprât al è une "lenghe cjacarade" lontane sedi dal furlan standard, sedi dal sens des peraulis e des regulis gramaticâls e sintatichis, si che la trame e jude un grun a tirâ sburtâ il voli.
Al va dit, e chest al è un fat, che nol è facil di lei, par un che al lei pôc furlan. Anzit, al è dificilut, almancul intal imprin, ancje par un che al è usât a leilu, il furlan.
Morat chi al à fat une sielte ben clare. Al à metût la plui part dal romanç in prime persone e chest al justifiche il fat che Pidins, il personaç naradôr, al podi cjacarâ e contâ lis aventuris sôs e dal so amì Saco, intal lengaç che al dopre simpri. E cui isal Pidins? E cui Saco?
Son doi zovenots. Un bravonon a zuiâ a balon e un simpri fumât (di budiesis, of course). Un che però al masse pôc trist par deventâ un balonaro e chel altri che al à cjâf ma al preferìs no pensâ, butâ dut a rodolons e vivi a la zornade. E dopo al è Donald (Duck) che al zire di ca e di lâ par lis pagjinis dal libri e al je propit lui, chel di Disney, chel di Barbe Paperon e di Qui, Quo e Qua.
E intal mieç si cjate un Friûl che al è deventât sedi fantastic, sedi fumut. Trens pierdûts intal mieç de nature e che nissun al sa nuie di lôr, bandis di int fûr cu la cassele che a sunin jazz. Mafiôs, putanis (no chês forsit no son, ma i stavin ben), magagnis, neris, hacker, bogns, triscj, pachis, intrîcs, sgnape, cjochis, e un grun, ma un grun di "sango y zarde"

Insome, si sin capîts, un davoi che metât al baste.
Metêt in cont ancje che Morat al tire fûr inglês e spagnûl e sclâf e todesc e lu misture cun citazions sparniçadis ca e là di ogni gjenar e us ven fûr chest librut (140 pagjinis), sostignût e pandût di Cormôr Salvadi e a cure di Pauli Kantarut che o ringrazi une vore par vêmal regalât.
Zontait ancje che secont mê la idee di vê metût dentri i fumuts di Christian Inzerillo, che ti puartin subit inte nature "fantastiche" de narazion, e je une idee une vore induvinade.

Oh che al sedi ben clâr. Donald al pues ancje no plasê. Al reste difat un viaç intun teritori che al va oltre la "buine lenghe scrite" e crodeimi, chest al un fat impuartant une vore, par la lenghe furlane, parcè che dome ce che al je ricognossût intune sô forme classiche al pues jessi superât di une forme inovative. Us al à dîs cuntune metafore: Picasso, prime di tacâ a piturâ cuadris fats di cubets e liniutis, al savevê fâ pituris tratis de realtât praticamentri perfetis; ven a stâi che prin lui al à imparât la regule, e daspò le à superade.
Donald dal Tiliment al romp lis regulis de coretece de lenghe, ma no lis ignore. Cheste e je la robe che mi è plasude di plui. Come a dî: fur cu la cassele sì, ma cun criteri.

E cumò, caz, sango y zarde!

lunedì 16 marzo 2009

Il cartel par la Udinese cul Catanie


Îr no je lade masse ben, ma paregjâ riscjant di vinci al è miôr che pierdi riscjant di paregjâ,
In ogni câs il cartel al jere di simpatiche polemiche cuinti i media nazionâi in gjenerâl... starìn a viodi joibe che e ven di cui che àn di cjacarâ... forsit a son bogns di fâ ducj i servizis sul Manchester o sul Chelsea... :)

giovedì 12 marzo 2009

Il cartel par la Udinese cul Zenit


Chest colp o jeri jù di Fantasie, ma o speri che la fantasie la metin in cjamp i zuiadôrs dal Udin.
Intant a lassi in anteprime di cualchi ore il cartel pe partide. :)

martedì 3 marzo 2009

Criùre


Frait
Rot
Patoc
Tant che la muse
Di une malatie

Cjoc
Cul inzirli
In tes sachetis
E un marimont
Di criùre
Intes ombrenis

Zornade lade cussì
Sledrosade
Smavide
Finide
In tal cjadin
Dal timp
Dai agns
Che a vendin il cûl
A la vecjaie
Dal spirt e da lis peraulis.

domenica 1 marzo 2009

Il cartel par la Udinese cul Lecce


Bon dai, o ûs met ancje il cartel pe Udinese cuintri il Lecce. Al pâr che chescj ultins doi a vedin puartât ben. Fintremai che o nin indenant zuiant mâl e vincint o fâs firme. :)

lunedì 23 febbraio 2009

Vueits


Simona e sintì lis aìnis di Yuri sot ai siei pîts discolçs.
E cirì a palpe lis scarpis, poiadis dongje dal jet, e doprant il telefonin e fasè lûs su la vierzidure taronde de jessude. In pîts intal scûr e spietà che l'implant centrâl di ossigjenazion al tacàs a rontâ come che al faseve ogni cuart di ore, e cuant che e sintì il sgrasaiâ dal motôr jemplâ lis orelis ancje je e impiâ l'argagn che al vierzeve la buse par lâ fûr. Sô mari e so pari e jere sigure che no si saressin inacuarts di nuie, ma chê gnot a nol jere il câs di riscjâ.
E dismontà la scjalute che e puartave al puiûl, picjade intal vueit sot di cjase sô, intant che Yuri la compagnave cuntune man ta la schene.
– Grazie – e cisicà je, poiantsi intal parepet e començant a metisi lis scarpis – E Alan?
– Nus spiete sul Puint Grant – i veve rispuindût il frutat, tirant fûr dal gjubot un argagn che al someave un telecomant.
– Ce isal?
– Un passepartout magnetic – i disè riduçant sot dal çuf – A son dôs setemanis che i lavori parsore. Al vierç di dut!
– E il regjistradôr di ricuarts?
– Lu à Alan.
– O seis grancj! – e disè Simona, cuntune ridade misturade inte vôs.
Si inviarin viers il Puint, compagnant cuntune man il parepet. I cjavei, blancs come il lat, a sfilavin lis scjalutis che, ogni pôc, a si rimpinavin su intes cjasis. Simona, tirade come une cuarde di violin, a tigneve dûr il flât, pensant che e steve cjaminant sot i siums di dute la sô int, mentri che e durmive intai jets. Lis cjasis, retangui cence barcons grampâts intal sofit de grande grote, a someavin gnotui cui voi sierâts, pront jevâ su e svualâ vie. Cuant che il rontâ artificiâl al tacà, come al solit, je e scaturì, e cirint par nature di tignîsi cun dutis dôs lis mans, e pocà di brut cuintri il parepet, cul telefonin che i sbrissà vie, colant intal vueit.
– Mierde! – e bruntulà a alte vôs.
– Dai, su piçule, nuie di grâf, – la cuietâ Yuri, che al veve viodût dut – tu larâs a cjolilu doman matine inte Rêts di Recupar. Movìnsi pluitost, che il vecjo Livio al è un che al stâ pôc a cambiâ idee.
E jere vere. Chel dopomisdì il nono di Alan, che piês che la vecjaie al veve dome la salût, al veve a la fin dite di sì, e a varessin podût regjistrâ sul ordenadôr lis imagjinis mentâi dai siei ricuarts. Al jere un dai pocjissims vecjos che al veve vivût tal mont di fûr, e Simona, Alan e Yuri, a varessin scuviert a la fin se chest mont antigon al jere verementri esistût o se al jere dome une liende di piturâ tai cjâfs da fruts.
Dopo vê saludât cuntune alçade di mustic Alan, a cjaminarin cence intops viers la cjase di Livio, traviersant il Puint Grant e une vore di altris puiûi, strents e dispès scûr, che a voltavin di ca e di là a ogni pissade di cjan.
A savevin di scugnî sghindâ la polizie, parcè che scjamâ ricuarts di un over-eighty al jere un reât, ancje se aromai nissun al veve un grant interès a fâlu, e ancje lôr a jerin une vore malfidant su chei mitics timps dal passât.
Dome cuant che a voltarin l'ultin cjanton si inacuarzerin da lis lûs celestinis che slusignavin propit li che a vevin di lâ lôr. Alc di lunc, involuçat intun linçûl blanc, al vignive calât de vierzidure, e lôr a capirin subit che la aventure e jere finide ancjemò prin di tacâ.
Alan, che so nono lu veve viodût a pene dôs o trê voltis, al restà impassibil, mentri che Simona, poiant i comedons al parepet, e tacà a vaî, e i lagrimons che a colarin intal vueit a traviersarin ancje lis maiis di fier finissimis des Rêts di Racuelte.
– Coragjo. – i disè Yuri, cjareçantle cui dêt blancjissims – Nol jere ancjemò l'ultin. Tu viodarâs che prin o dopo o discuvierzarin cemût che al jere fat chest famôs soreli.

_________________
Version par talian

martedì 17 febbraio 2009

Un cartel par mandâlu in Polonie


Ve chi.
Zire e volte la vôs si è spandude e cumò mi fasin fâ ancje i cartei su ordinazion :)
(Nicola tu as une bire di paiami). Ven a stâi che us mostri il cartel, un pôc criptic, che doman al cjaparà il viaç pe Polonie e, se du al va ben, al insegnarà un pôc di furlan a chei di Poznan :)
Intant, se propit no us va ben cu la Udinese, podês simpri deventâ tifôs dai amadôrs dal Sclaunic, che par cumò a tegnin il nâs devant di ducj chei altris. :)

domenica 15 febbraio 2009

Pescrûtcrotsfritsûsfraits

Si diseve cusì une volte, di piçui, par fâ someâ il furlan a une lenghe foreste:
Pescrûtcrotsfritsûsfraits.
Al voleve dî, in veretât "Pes crût, Crots frits, ûs fraits" che a jerin dutis robis che a povevin fâ une vore "schifo". Mi è vignude su chest mût di dî, vuê, par la fotografie che a viodês e che no je il risultât di cuissâ cuâl inquinament, ma la fin dal puâr scuâl de ledre di Sclaunic, propit daûr i orts. Cualchidun, ancje se de imagjine no si viôt, al je inmò vîf, ancje se aromai, al varà bielzà tirât i sghirets di cualchi ore.
No je une robe masse biele di viodi, nomo?
Vuê se o vês let i giornâi a vês viodût che chest pes al je mancul piês dai cuintâi di cjar lade di mâl che ân cjatât, ma o volevi dome pandi une riflession ancje su chest, e no dome su la cjar, che chel al je un reât e che si rangjin lis vigjii e carabinîrs a cjata cui che al je stât.
E je usance, di cuant che o jeri frut, che il Consorzi de Ledre-Tiliment al gjavi la aghe inte nestre piçule ledrute (come in tantis altris) cu la motivazion di netâlis des scovacis e de jerbe. Par solit, cuant che sierin la aghe, a passin chei dal ETP (mi pâr) a cjapâ sù il pes che al vanze par molâlu di altris bandis o tignîlu in alevament par semenadis che àn di vignî.
E chest pes? Parcè lu lassino murî cussì?
La rispueste no je tant dificile: chest pes nol je trute.
Lis trutis a àn un valôr economic-alimentâr, evidentementri, e cuant che passin a cjapâ sù il pes, si viôt che a stan ben atents a no che i vegni sù inte vuate il puar scuâl (o gjavedâl, o vanin, come che a lu clame cualchidun).
Se la critiche come animalist no pues fâle, parcè i volarès la insot un tic di plui, a pues di sigûr fa une critiche ambientâl-sanitarie: chescj chilos di pes cumò a laràn di mâl, e lassin sta la puce, che di sigûr a tacarâ a sintîsi pene che al va vie il frêt, ma isal un ben pai bateris e microorganisms che a nassaràn de decomposizion?
Che o sedi colpe dal Consorzi, che o sedi dal ETP, dal Comun o dal Pape, la puce a varàn di nasâle chei di Sclaunic!
E fortune che jo o soi a stâ lontan :)

domenica 8 febbraio 2009

Il cartel par la Udinese cul Bologne

Ben po...
Aromai o stavi par rassegnami a un misar zero a zero
O jeri juste chi sul blog che o metevi adun la imagjine e ve che Sanchez nus à regalât il gôl de vitorie!
Miôr di cussì!
Dai che a si torne a cori...
Il soreli blanc e neri al vignût fûr!

mercoledì 4 febbraio 2009

Un voli de gnot


Un voli de gnot
Une grispe dal scûr
Il barbezuan

giovedì 29 gennaio 2009

Un cartel par furlan su "strisse la gnove"

Ben po sì! E jere propit ore!
E jere ore che la Udinese e vincès
E jere ore che mê pari cul mê cartel al les a finîle sul gjornâl
E cun di plui, cuant che a si dîs che a son ladis dutis dretis, il manifest anti-peule di îr al è lât a finîle ancje su "strisse la gnove"
(o strissine la gnove, o striscia la notizia o cemût che a volês clamâle)
A podês fracâ a chi, par viodi il filmât di "strissine il strission" che àn fat viodi usgnot.
E pensâ che chist colp, par jessi scaramantic, no vevi nancje metût sul blog il cartel prin de partide (ancje parcè che no vevi vût timp :)
Ad ogni mût e jere ore ancje di viodi i zuiadôrs che a corin. I trê ponts di îr a son stâts propit une biele sodisfazion!

martedì 27 gennaio 2009

Aldo Rossi - Un cd... Furlan

Cuant che l'artist in persone a ti regale il so cd no tu puedis fâ di mancul di spindi dôs peraulis sul disc... ancje par fâ capî che tu lu as scoltât :)
Ve chi, duncje, un pâr di peraulis, o ancje cuatri dai.

Comencin dal imprin. Aldo Rossi lu ai viodût a sunâ pe prime volte a musiche furlane fuarte, l'an passât, dulà che se no voi sbaliant al à presentât i tocs di chest cd.
Mi visi ancjemò vonde ben che la performance a no mi jere plasude masse, par un pâr di motîfs. Un di caratar personâl, che al cole su la mê preference musicâi, che si slontanin da le part plui "pop" di musiche di Aldo; la seconde invezit, pe part purementri tecniche. Lis cjançons, cjantadis di Aldo di bessôl, cun ghitare in braç, e base regjistrade daûr, a àn scontât il fat di vignî fûr fredutis e aprossimativis. Di chi il mê judizi al jere restât incjastrât intun "nol fâs par mê" che se no ves cognossût di persone l'artist al sarès ancjemò fêr a li.

Ce isal cambiât scoltant il disc? Dut!
Al è cambiât che il bon Aldo Rossi al è un pôc come il Lenny Kravitz furlan. No, no stêt capî mâl, nol è neri, muscolôs e plen di frice par ducj i cjantons. Al è come Lenny intal sens che al fâs dut di bessôl, messedant ducj i suns, sedi chei eletronics, sedi chei peâts ai struments.
Ven a stâi che il so lavôr al mostre in plen lis sôs tindincis musicâls che a son une vore ecletichis e diferenziadis. Chest disc, se par câs us capite sot man, al è dificil che us plasi dut a la stesse maniere. A saran cjançons che vegnin incuintri ai vuestris guscj e altres che invezit i dan cuintri.
Podopo al è evident che bisugne viodi la vierzidure mentâl di chel che al scolte, ma in ogni câs al è ancje une vore dificil che no cjatedis il vuestri toc.

Us fâs l'esempli dal mê câs.
"Brache chel cjan" par dî, no mi plâs masse, e no mi jere plasude nancje dal vîf. Chest, vûstu parcè che il campionament (jump around) al è ancje masse classic, vûstu parcè che il toc di test par talian mi sa di sfuarçat.
"Furlan" invezit, a lu cjati tai miôr tocs furlans di simpri, ancje se il debit al prin Tizian Fier (chel di perdono) al è vonde fuart. In ogni câs il toc al è une vore ben misturât e a un test cuntune metriche une vore induvinade si tache une eletroniche semplice ma no scontade. Un dai miei preferîts insome.
Daspò, di une bande no soi lât mat par lis sugjestions dance di "Desire", ma o ai cjatât bon "A la sù", il toc intimist, inte tradizion dai songwriters classics vôs e ghitare.
Se dopo o voi a cjalâ i toc che a son une vore lontans dai miei guscj musicâi, ancje chi o rivi a cjatâ alc di bon. Il latin-merecanegjant "Su pa muse", pûr jessint jo un che cheste musiche i fâs cressi il pêl su lis plantis dai pîts, al è un toc che si sint cun plasè. E simpri in cheste categorie jo o cjati une vore bon il toc lounge "Gno pais" dulà che secont mê Aldo al è rivât a pleâ la lenghe furlane come un vistît perfet, intor de musiche post-dance.
Dopo ce altri vêso voie di savê?
Se a volês une opinion personâl, Aldo, pur jessint un personaç ironic e une vore peât a sensazions di ligrie e musiche lizere, al è pront par rindi une vore ben intun contest di cjançon "serie", che e strice un voli ancje ai moments mancul zuarins de vite. Ma ce âstu di fâ... a voli al è un inguaribil peter pan, e al larà indenant cussì. :)

Se us ai metût curiositât a podês sintê un pocjis de sôs cjançons sul so myspace.

lunedì 19 gennaio 2009

Il cjant



– Moveisiii! – e vuicave il cjâf di Fiona, poiât sul comodin.
Chel altri toc di jê, cence vistîts e vergogne, al pocave ta la mobilie e su pai mûrs da la cjamare, spandint cun dispiet pissin e mierde tor pal paviment.
I vevin taiât il cjâf intant che a durmive, cjoche in bale di Guinness e sglonfe di salmon fumât. Al jere stât Liam a vê voie di provâ, istintîf come simpri. La none Abigail i al veve dit, che non sarès coventât a nuie, ma lui, cjastron come so pari, nol veve volût sinti nissune altre cjampane. Cuant che al veve plantât la manarie inta chel cuel tombadiç, Fiona e veve rutât cussì fuart di fâ tramâ lis tendis. Po dopo, intant che il cjâf al rodolave par tiere e i cjavei, luncs e ros, a si ingropavin tor il nâs e lis orelis, jê e veve tacât a ridi. E jere une ridade sgrasaiote, scuasit un vuicâ. Al pareve il ciulâ di un cjan striçât di une machine. A vevin ducj metût lis mans su lis orelis, gjavantlis cun solêf cuant che chel cuel taiât al someave vê finît di patî. Invezit, dopo un cidinôr durât un lamp, Fiona e veve començât, se pûr trabascjant e pastroçant lis peraulis, a cjantâ
E leve indevant a dî e tornâ a dî che litanie fastidiose, ancje se no come il ridi di prin. Lôr a capivin dome cualchi peraule: machine, triangul, budiei, rôl, gjugjule… ma nissun, in chês vocâls slungjadis fin spacâsi, al rivave adore a cjatâ une logjiche. A vevin crodût ducj che al fos un ultin deliri prin di tirâ su i scarpets. Dome la none e jere vignude blancje e ju veve obleâts a lâ subit fûr di che cjamare, sierant a clâf la puarte.
Lôr, cence bati voli, a vevin subit ubidît, plens di pôre par dut chel cjantâ sfuarçât e par chel cuarp che al cirive di dismontâ dal jet. Cuant che forin fûr de cjamare però, a vevin començât a riduçâ e a fâ i compliments a Liam. Prin o dopo Fiona e varès fermât di scjassâsi e lôr a varessin podût sintisi liberâts di chê malsane presince. Dome none Abigail, no si sintive plui cjantâ, no si jere dismolade. E stave cidine, cuntune muse a mieç fra il malcuiet e il rassegnât.
Tal imprin a vevin tacât ducj a ridile, disint che e jere la solite pessimiste, ma a vevin scugnût tornâ a mangjâsi lis peraulis dome un pâr di oris dopo, cuant che un poliziot da la Garde al veve sunât il campanel par dîsi che barbe Seamus al jere lât a sbati.
La ploie… l’asfalt slichignot… une distrazion… In chel cidinôr fûr di scuare chês peraulis a rodolavin come glaç intune tace vueide, ma lôr no lis sintivin plui.
Dut chest al capitave pôc mancul di un mês indaûr.
Di chê volte, dopo jessi stât tirât fûr dal acuari, dulà che Liam lu veve butât par scjafoiâlu, o almancul par fâlu tasê, chel cjâf al jere deventât simpri plui esigjent. Dal comodin dulà che lu vevin poiât, al veve cjantât une altre volte, par cunvinci ducj che la muart di barbe Seamus no jere un câs. Cussì e jere muarte la puare Eileen, sô cusine, ancje se i soi novante e passe agns, e il sô mastià e spudâ tabac di continuo, a vevin fât deventâ che tombule mortâl scuasit benvignude
A nissun però al jere scjampât il sô cjant, che pôcs minûts prin, stiçade par il blood pudding che no i vevin puartât, e veve intonât la litanie, contant cun particolâr gjonde il corot che ancjemò al veve di rivâ. Il telefon da la nonute al sunave za dibant, cuant che rivarin adore a intindi ce che al jere sucedût. Daspò di chel moment, par ducj, al jere stât un deliri.
– Eehh! Eeeh! Eeeehh! – a businave ancjemò Fiona, une altre volte cjoche – Cuant al rivie il mê Powers!
Abigail, che di whiskey no si intindeve, a mateave cul telefonin, cirint di clamâ a un dai fîs, o a sô brût, o a un cualsisei dai nevôts.
A saveve che Doreen e jere dal rivendicul a cirî lis patatinis cul pevar, Sinead a cjoli il gjelat aromatizât cun la Guinness, Roan pai boscs cun Neil, a sgarfâ fûr tartufulis. Brenda e Cormac no si visave nancje dulà che a jerin lâts a pierdisi, par contentâ l’enesim estri. Il rest de famee al jere a durmî, scanât di chê continue tension che no vevin rivât a cjatâ altre soluzion, se no chê di ubidî.
Çuetant su la sô mace e jere lade dongje al cjadin li che e jere dentri il cjâf di chel spirt, cun l’idee di spiegâi che e veve di vê un pocje di pazience, e magari butantji tal glutâr altre bire, sperant che la volès. Masse tart. Fiona, cun mieze muse in muel inta ce che a veve za bevût e veve i smursiei ruans. E veve cjalât fis la puare Abigail cui soi voi verts, li che no jere nuie che al ricuardàs il judizi cjapât su i tancj secui di vite, ma e si viodeve dome morbin e matetât. Daspò si jere sclaride il cuel cuntun colp di tos, e veve començât a cjantâ.
Abigail, distrute, si jere sintade sul jet, cence fâ plui câs al cuarp cence cjâf che ogni tant i leve a sbati intor. La disperazion a le veve ingropade intune maniere che scuasit e sperave di jessi jê la protagoniste da la cjançon di chest colp. Jessi une famee numerose al jere il piês ingòs che ti podeve capitâ, se la tô banshee e dave di mat.
Si jere fate anim e jere jessude de cjamare, sierantsi le puarte su la schene, e jere lade a sintâsi dongje la puarte, cul telefon sui zenoi. Dome a chel pont e veve començât a vaî, cence savê par cui.

mercoledì 14 gennaio 2009

Fotografiis, sbits, curiositâts e contis

Vuê e va cussì:
Soi masse strac par scrivi, masse pôc strac par durmì, ma vonde strac par no podê lei cence indurmidîmi.
Ven a stai che us scrîf chestis riis sul blog par il gust di cjacarâ e contâus alc.
Tant par començâ cjalait ce biele fotografie.
Nol è nuie ce fâ, l'art digjitâl a podarà ancje vê savoltât cheste maniere di mostrâ il mont, ma imagjinis come cheste e àn dentri une anime che al è une vore dificil cjatâ in dì di vuê.
Che in pîts a çampe e je mê mari che cumò 'nd à passâts i sessante e che inta che etât si taiave ancjemò i cjavei cu la scudiele (e si viôt!).
Bon, nuie, dut a chi. A volevi pandi il gust di cjalâ une imagjine di curtîl furlan dal secul passât. :)



Cambiant discors, vuê matine mi è capitât di fracâ su Fantats Furlans, che al jere un pôc che a no lavi a "cjatâju" e o ai scjamât la version pdf di sbit, un fregul fat par ridi, e a di dî il vêr un pâr di ridadis a lis ai fatis. Sarà ancje stât artesanâl, intai disens e inte grafie, ma se o sês int che e vûl e pues cjapâsi cinc minûts di pause in ufici, scjamaitlu e butait un voli.

Tierce robe, cussì, par cjacarà, ma savêso che il non dal repipin (ven a stâi, il regolo, per taliano) al ven dal non dal re (mi pâr dai Avars) che al veve gjestît il Friûl tor i Votcent? Parcè chest ucielut cussì picinin al è stât clamât come un Re. In veretât chest ucielut ancje se piçul, al è une vore voraç. Simpri a nivel di curiositâts o pues dîus che o stoi leint il strolic e che la gnove di vierzidure e jè la origjine furlane di Giulietta e Romeo, che in vie indirete a saressin rivâts ai voi dal bon William, cjapant la ispirazion di doi inamorâts furlans.

Ultime robe che mi fâs plasè segnalâus e je la nassite de prime Ostarie Leterarie Furlane che a podês cjatâ fracant a chi e dulà o ai cjatais une mê conte bielzà publicade su chel altri blog, par talian, ma inedite par furlan.

Bon, vonde par vuê. :)

sabato 10 gennaio 2009

Il cartel par l'Udinese cu la Sampdorie

Ve chi, i vûl començât l'an gnûf cuntune partide che nus dedi sodisfazion, a nô puar tifôs, e ce miôr di un biel incoragjament a la scuadre. Sperìn che doman e ledi drete...

Finiment e principi - une poesie par cambiâ an


Ju vevi scrits par talian, il mê bon finiment e il mê bon principi, ma mi plaseve començâ ancje chest blog cun lôr e cussì ju ai voltâts par furlan.


FINIMENT E PRINCIPI


Prin di scomençâ
I vûl finît
E che il finiment, nol sedi fat a câs
Sierâ i dêts
Intun pugn
E butâju vie
Lontan
Cui rimuars
Che a si fasin
Scontrins fruçâts
I displasès
Aiar
Che chel almancul
Nol coste nuie
Invezit pai prins
Tu âs bielzà finît di paiâ
Pai biei ricuarts
Al contrari
Nol varès di jessi intrigôs
Fâju deventâ coriandui
Emetiju in sachete
Par agns
Cence platâju mai

Dopo di chest o brami
Par ducj voaltris
Di rivâ adore a sporcjâ
Il vuestri ator
Cjocolate intal lat
Pluitost che il contrari
Visâsi che e baste une gote
Par tirâ su un mâr
Dilunc di une pagjine
E cence che lis peraulis
A sedin di burascje
Visâsi che une manece
No jentre inta chê altre man
Ma par ledrôs sì
E al fâs il so lavôr
E in ultin o speri
Di no dismenteâmi mai
Che al è plui impuartant il scat
Che la fotografie